З юбілеем Міско Івана Якімавіча – народнага мастака Рэспублікі Беларусь

Нацыянальны мастацкі музей Рэспублікі Беларусь сардэчна віншуе з юбілеем Міско Івана Якімавіча – народнага мастака Рэспублікі Беларусь.

Іван Міско нарадзіўся 22 лютага 1932 г. у вёсцы Чамяры Слонімскага раёна Гродзенскай вобласці. Вучыўся на курсах Усесаюзнага Дома народнай творчасці імя Н.К. Крупскай у Маскве (1952–1954), у Мінскім мастацкім вучылішчы (1954–1957) у Ігара Глебава і Віктара Папова, у Беларускім дзяржаўным тэатральна-мастацкім інстытуце /зараз Беларуская дзяржаўная акадэмія мастацтваў (1960–1966, кафедра скульптуры)/ у Андрэя Бембеля і Аляксея Глебава. Іван Міско працаваў мастаком-афарміцелем у Дзяржаўным мастацкім музеі БССР /зараз Нацыянальны мастацкі музей Рэспублікі Беларусь (1957–1977).

Іван Міско – заслужаны дзеяч мастацтваў БССР (1989), народны мастак Рэспублікі Беларусь (2008), лаўрэат Дзяржаўнай прэміі СССР (1977), узнагароджаны медалём Францыска Скарыны (2002).

Іван Міско з 1965 года сябра Саюза мастакоў БССР. Удзельнічае ў рэспубліканскіх і міжнародных выстаўках з 1957. Працуе ў станковай і манументальнай скульптуры. У асноўным, гэта партрэты сучаснікаў: пісьменнікаў, акцёраў, музыкантаў, касманаўтаў, спартсменаў, навукоўцаў. Ім выкананы помнікі Максіму Горкаму ў дзіцячым парку Мінска і Маці-патрыётцы Анастасіі Купрыянавай у Жодзіна, створаныя ў садружнасці са скульптарамі Мікалаем Рыжанковым, Андрэем Заспіцкім і архітэктарам Алегам Трафімчуком. Помнікі першым беларускім касманаўтам Пятру Клімуку ў Брэсце і Уладзіміру Кавалёнку ў Крупках. Адна з галоўных тэм скульптара – гэта касманаўтыка. Вялікая колькасць партрэтаў і тэматычных кампазіцый выканаў аўтар для Зорнага гарадка. Гэта не толькі беларускія і рускія касманаўты, але і прадстаўнікі Аўстрыі, Афганістана, Балгарыі, Вялікабрытаніі, В’етнама, Германіі, Індыі, Кубы, Манголіі, Польшчы, Румыніі, Сірыі, Францыі, Японіі.

У Слоніме адкрыты музей Івана Міско, для якога скульптар перадаў частку сваіх твораў. На сённяшні дзень у калекцыі Нацыянальнага мастацкага музея знаходзіцца 15 твораў скульптара Івана Міско, тры з якіх у пастаяннай экспазіцыі.